🌙 ہماری تہذیب کی جانب سے
آپ سب کو رمضان مبارک! ✨

نام کتاب: باغ (غزلوں کا مجموعہ)

مصنف : نیازؔ جیراجپوری

ضخامت: ۲۰۸ صفحات
قیمت: ۳۵۰ روپئے
مبصر: فرحان حنیف وارثی ( ممبئی )
رابطہ نمبر: 9320169397
نیازؔ جیراجپوری کا شعری مجموعہ ’باغ‘ موصول ہُوا۔خوبصورت سرِ ورق اور اتنی ہی اچّھی شاعری سے مزین ’باغ‘ دیکھنے اور پڑھنے سے دل باغ باغ ہو گیا۔ نیازؔ جیراجپوری جتنے پیارے انسان ہیں ، اتنی ہی پیاری انکی شاعری ہے۔

نیازؔ جیراجپوری کی شاعری مِٹّی سے اُٹھنے والی سوندھی مہک کی طرح ہے جو سانسوں میں رچ بس کر زندگی کو تازگی کا احساس کراتی ہے۔ اُنہیں خیالات کو الفاظ کے پورٹریٹ میں ڈھالنے کا ہُنر آتا ہے۔ رومانی اشعار دل کو چُھو لیتے ہیں اور پڑھتے وقت مزہ دیتے ہیں۔

وہ بھاری بھرکم الفاظ کے بجائے آسان لفظوں میں گہری بات بڑی روانی سے کہہ جاتے ہیں۔ اس میں کوئی مبالغہ آرائی نہیں ہے کہ بڑے دنوں بعد مجھے اچھی شاعری پڑھنے اور اس سے لطف اندوز ہونے کا موقع ملا۔ پڑھتے وقت بوریت محسوس نہیں ہوتی اور میں نے ایک نشست میں یکے بعد دیگرے کئی غزلیں پڑھ ڈالیں۔ اپنی پسند کے چند اشعار یہاں پیش کر رہاہوں۔ ۔۔
روز و شب میرے پوچھتے ہیں نیازؔ
زندگی سے نہیں مِلوگے کیا
٭
بے ٹِھکانہ کبوتر کو مِل جائے گھر
کاش ! ہٹ جائے اِک اِینٹ دیوار سے
٭
ہمکو جینا سِکھا رہا تھا نیازؔ
لڑ رہا تھا دِیا جو آندھی سے
٭
جاگتی آنکھوں میں رنگولی سجائیں سپنوں کی
لَوٹتی پنگھٹ سے مٹکوں والیاں اور چاندنی
٭
’ باغ ‘ کے بیک پیج پر پروفیسر شہپرؔ رسول کا تعارفی نوٹ ہے۔زیرِ نظر مجموعہ میں 105 غزلیں اور متفرق اشعار ہیں۔ کتاب کا سرِ ورق بہت خوبصورت ہے اور اسے صوفیہ انجم تاج ( امریکہ ) نے تخلیق کیا ہے۔ طباعت عمدہ ہے ۔ صفحات کی تعداد 208 اور قیمت 350 روپئے ہے۔ ایجوکیشنل پبلشنگ ہاؤس نئی دہلی(رابطہ: 011 41418204 ) نے ’باغ‘ کو شادابی بخشی ہے۔

نیازؔ جیراجپوری سے 993575123 \ 9452505605 پر رابطہ کیا جا سکتا ہے۔
٭٭٭